این ڈی اے کو محض 320 اراکین پارلیمنٹ کی حمایت، دو تہائی اکثریت حاصل کرنا آسان نہیں!


قومی آواز بیورو

قومی آواز بیورو


مرکز میں برسراقتدار ’نیشنل ڈیموکریٹک الائنس‘ (این ڈی اے) اب حد بندی اور خواتین ریزرویشن سے متعلق ترمیمی بل منظور کرانے کے لیے اپنی پوری طاقت جھونکتا نظر آ رہا ہے۔ اطلاع کے مطابق آئندہ سرمائی اجلاس میں یہ بل پیش کیا جا سکتا ہے۔ خاص بات یہ ہے کہ اس بل کو منظور کرانے کے لیے این ڈی اے کو لوک سبھا میں دو تہائی اکثریت کا ہدف حاصل کرنا ہوگا۔ راشٹریہ لوک دل کے سینئر لیڈر کے سی تیاگی کا کہنا ہے کہ ’’حدبندی بل اور خواتین سے متعلق بل، دونوں پیش کیے جانے کا امکان ہے۔ این ڈی اے پوری طاقت کے ساتھ انہیں منظور کرانے کی کوشش کرے گا۔ ہمیں امید ہے کہ یہ بل پاس ہو جائے گا۔ کانگریس سمیت اپوزیشن کے بارے میں انہوں نے کہا کہ مجھے نہیں لگتا کہ حدبندی اور خواتین سے متعلق بل کی مخالفت کر کے کانگریس عوام میں اپنی ساکھ کمزور کرے گی۔‘‘


دراصل امکان ظاہر کیا جا رہا ہے کہ دسمبر کے پہلے ہفتہ میں ہی پارلیمنٹ کا سرمائی اجلاس شروع ہوگا۔ حالانکہ اب تک تاریخوں کا اعلان نہیں کیا گیا ہے۔ بی جے پی ترجمان آر پی سنگھ نے کہا کہ دیکھیے ہم تو خواتین ریزرویشن بل کو لانا ہی چاہتے ہیں۔ ہم چاہتے ہیں کہ خواتین کی سیٹوں میں اضافہ ہو۔ حدبندی ہو اور خواتین کی نشستوں کی تعداد بڑھے۔ لیکن اپوزیشن قصداً رکاوٹیں پیدا کرتی ہے۔ آئینی ترمیم سے متعلق بل کو منظور کرانے کے لیے صرف اکثریت کافی نہیں ہے، بلکہ ایوان میں دو تہائی اکثریت حاصل کرنا ضروری ہے۔ اس کے لیے حکومت کو 361 اراکین کی حمایت چاہئے۔ یہ تعداد اس لیے ہے کہ فی الحال لوک سبھا میں کل 540 اراکین پارلیمنٹ ہیں اور 3 سیٹیں خالی ہیں۔




فی الوقت حکومت کے پاس 320 اراکین پارلیمنٹ کی حمایت ہے، جو آئینی ترمیم سے متعلق کسی بھی بل کو منظور کرانے کے لیے کافی نہیں ہوگا۔ اس لحاظ سے این ڈی اے کو مزید 21 اراکین کی حمایت چاہئے۔ یعنی یہ واضح ہے کہ اپوزیشن جماعتوں کی حمایت کے بغیر یہ ممکن نہیں ہے۔ قیاس آرائی کی جا رہی تھی کہ این ڈی اے کی کئی اپوزیشن جماعتوں سے بات چیت چل رہی ہے، لیکن اب تک کسی بھی جماعت نے کھل کر اس بل کی حمایت نہیں کی ہے۔ پی ٹی آئی بھاشا سے جمعرات کے روز بات چیت کرتے ہوئے حکومت کے ایک سینئر عہدیدار نے کہا کہ یہ بل 15 سے 18 ووٹوں کے فرق سے منظور ہو جائے گا۔ خاص بات یہ ہے کہ اب تک مانسون اجلاس کا باضابطہ اختتام نہیں ہوا ہے۔ اجلاس 13 اگست کو غیر معینہ مدت کے لیے ملتوی کردیا گیا تھا۔ اس طرح 94 دن گزرنے کے باوجود اجلاس کا باضابطہ اختتام نہیں ہوا، جو ایک ریکارڈ ہے۔


ان بلوں کا مقصد حدبندی کے ذریعے لوک سبھا کی موجودہ 543 نشستوں کی تعداد بڑھا کر زیادہ سے زیادہ 850 کرنا ہے۔ اس سے 2029 کے عام انتخابات سے قبل پارلیمنٹ اور ریاستی اسمبلیوں میں خواتین کے لیے 33 فیصد ریزرویشن نافذ کرنے کی راہ ہموار ہو جائے گی۔ ایجنسی کے مطابق معلوم ہوا ہے کہ حکومت ایک ایسے فارمولے پر غور کر رہی ہے، جس کے تحت تمام ریاستوں میں لوک سبھا کی نشستوں کی تعداد میں 50 فیصد تک اضافہ کیا جا سکتا ہے۔ اس کا مقصد حدبندی کے اثرات کے حوالے سے ظاہر کی جانے والی تشویشات کو دور کرنا ہے، خاص طور پر جنوبی ریاستوں کے خدشات کو۔





امریکہ اور روس ’اے آئی‘ ہتھیاروں پر ضابطہ بنانے کے خلاف، 128 ممالک کریں گے تبادلۂ خیال


قومی آواز بیورو

قومی آواز بیورو


دنیا بھر میں مصنوعی ذہانت (اے آئی) کا استعمال اب ہتھیاروں میں بھی بڑھنے لگا ہے۔ اے آئی ہتھیار انسانوں کے حکم کے بغیر ہی دشمن کی شناخت کر کے حملہ کر سکتے ہیں۔ ان پر قابو پانے کے لیے اقوام متحدہ میں بین الاقوامی قوانین بنانے کی تیاریاں کی جا رہی ہیں۔ حالانکہ امریکہ اور روس اس کی مخالفت کر رہے ہیں، اور اسرائیل بھی ایسے ضابطوں کے خلاف ہے۔ رائٹرز کی رپورٹ کے مطابق اس مسئلے پر پیر سے سوئٹزرلینڈ کے جنیوا میں اقوام متحدہ کی میٹنگ کا آغاز ہو رہا ہے۔ اس میٹنگ میں 128 ممالک شامل ہو رہے ہیں۔ میٹنگ میں اس پہلو پر تبادلۂ خیال کیا جائے گا کہ ان ہتھیاروں کے استعمال پر پابندی لگانے یا انہیں قابو میں رکھنے کے لیے قانونی معاہدہ کیا جائے یا نہیں۔



ان ہتھیاروں کو ’لیتھل آٹونومس ویپن سسٹم‘ (ایل اے ڈبلیو ایس) کہا جاتا ہے۔ ان میں ڈرون، روبوٹ، ٹینک اور آبدوز شامل ہیں۔ یہ مصنوعی ذہانت (اے آئی) کی مدد سے خود ہی اپنے ہدف کی شناخت کر کے حملہ کر سکتے ہیں۔ یوکرین، سوڈان اور مشرق وسطیٰ میں جاری تنازعات میں اے آئی سے چلنے والے بعض ہتھیاروں کا استعمال بھی ہو چکا ہے۔ امریکہ کا کہنا ہے کہ جنگ سے متعلق قوانین پہلے ہی بین الاقوامی قوانین میں موجود ہیں، اس لیے نئے قوانین بنانے کی ضرورت نہیں ہے۔ اس کے بجائے ان ہتھیاروں کے استعمال کے لیے کچھ رہنما اصول وضع کیے جانے چاہئیں۔ امریکہ نے قانونی طور پر پابند نہ ہونے والے معاہدے پر مذاکرات کے لیے 5 برس کا وقت دینے کی تجویز پیش کی ہے۔




روس نے میٹنگ سے قبل اپنا موقف ظاہر نہیں کیا ہے، لیکن وہ ماضی میں بھی ایسے قانونی معاہدوں کی مخالفت کرتا رہا ہے۔ ایک مغربی سفارت کار کے مطابق روس میٹنگ میں یورپی یونین (ای یو) کو اپنا موقف پیش کرنے سے روکنے کی کوشش کرے گا۔ امریکہ اور روس نے ستمبر میں بھی ان ہتھیاروں سے ہونے والے نقصانات سے متعلق تیار کی گئی ایک تجویز کو کمزور کرنے کی کوشش کی تھی۔ ریڈ کراس کا کہنا ہے کہ موجودہ بین الاقوامی قانون ان ہتھیاروں سے وابستہ خطرات کو روکنے کے لیے کافی نہیں ہے۔ اقوام متحدہ، انٹرنیشنل کمیٹی آف ریڈ کراس اور پوپ بھی ان خطرات کے حوالے سے وارننگ دے چکے ہیں۔


ہیومن رائٹس واچ کی ویرٹی کوائل کا کہنا ہے کہ مشینوں کو یہ فیصلہ کرنے کا اختیار نہیں ملنا چاہئے کہ جنگ میں کون جیے گا اور کون مرے گا۔ فیوچر آف لائف انسٹی ٹیوٹ کی انا ہیئر نے کہا کہ ایسے ہتھیار اب صرف تخیلات کا حصہ نہیں ہیں۔ ان کے غلط فیصلوں کی وجہ سے انسانی جانیں جا سکتی ہیں۔ میٹنگ کے صدر نے قانونی معاہدے پر تبادلۂ خیال کے لیے 2 برس کا وقت دینے کی تجویز پیش کی ہے۔ برطانیہ، جرمنی اور فرانس بھی معاہدے پر تبادلۂ خیال کرنا چاہتے ہیں، لیکن اس کی قانونی ذمہ داری کا فیصلہ بعد میں کرنا چاہتے ہیں۔ سفارت کاروں کو امید ہے کہ ہفتہ کے اختتام تک اس مسئلے پر تبادلۂ خیال کا راستہ نکل سکتا ہے۔






وسط مدتی انتخابات میں شکست کے بعد ٹرمپ کی پارٹی میں بغاوت، باغیوں کو دی جا رہی دھمکی


قومی آواز بیورو

قومی آواز بیورو


وسط مدتی انتخابات میں شکسٹ کے بعد امریکی صدر ڈونالڈ ٹرمپ کی پارٹی میں بغاوت شروع ہو گئی ہے۔ ریپبلکن نیشنل کمیٹی (آر این سی) کے چیئرمین جو گروٹرز کو عہدے سے ہٹانے کا مطالبہ تیز ہو گیا ہے۔ گروٹرز کو ٹرمپ کا قریبی ساتھی مانا جاتا ہے اور ٹرمپ انہیں عہدے پر برقرار رکھنا چاہتے ہیں۔ پارٹی کے کچھ لیڈران گروٹرز کی مدت کار میں ہونے والے اخراجات کی جانچ چاہتے ہیں۔ ان میں ٹرمپ اور دیگر عہدیداروں کے بال بنوانے اور میک اَپ پر ہونے والے اخراجات بھی شامل ہیں۔ ٹرمپ کی سابق چیف آف اسٹاف سوسی وائلز کی بیٹی کیرولین وائلز کو ملازمت دینے پر بھی سوالات اٹھ رہے ہیں۔ پارٹی کے مختلف گروپ ایک دوسرے کے خلاف ای میلز اور خفیہ معلومات لیک کر رہے ہیں۔ وہیں وائٹ ہاؤس نے باغی لیڈران کو خبردار کیا ہے کہ اگر وہ پیچھے نہیں ہٹے تو پارٹی کو ملنے والی مالی امداد بند کی جا سکتی ہے۔


یہ بھی پڑھیں : ٹرمپ انتظامیہ کو امریکی عدالت سے جھٹکا، گولف کورس منصوبے پر عدالتی پابندی

آر این سی کی دوسری سب سے بڑی آفیسر اور کینٹکی کی لیڈر کراسبی اس مہم کی قیادت کر رہی ہیں۔ انہوں نے 5 نومبر کو خط لکھ کر انتخاب میں شکست کو سنگین مسئلہ قرار دیا تھا اور نتائج کا ایماندارانہ جائزہ لینے کا مطالبہ کیا۔ وہ ٹرمپ کی ایم اے جی اے پالیسی کی حمایت کرتی ہیں۔ ٹینیسی سے آر این سی کے رکن آسکر بروک نے ان کی حمایت کی ہے۔ ان کا کہنا ہے کہ پارٹی کا کام سبھی ریپبلکن امیدواروں کو کامیاب بنانا ہے، نہ کہ ہمیشہ کسی ایک شخص کی حمایت کرنا۔ ورجینیا کی پیٹی لائمن نے بھی قیادت میں تبدیلی کی ضرورت پر زور دیا ہے۔ روڈ آئی لینڈ کی سو سینکی کے مطابق جنوری میں ہونے والی میٹنگ میں کراسبی کو 10 ریاستوں کے کم از کم 20 ارکان کی حمایت مل سکتی ہے۔ ان کی امیدواری کے لیے اتنے ارکان کی حمایت ضروری ہے۔




کراسبی کے خط سے ٹرمپ ناراض ہیں۔ انہوں نے سوشل میڈیا پلیٹ فارم ٹروتھ سوشل پر گروٹرز کو ’ایم اے جی اے واریر‘ قرار دیتے ہوئے مکمل حمایت دی ہے۔ حالانکہ گروٹرز کے مخالفین کا کہنا ہے کہ ٹیکساس، جنوبی کیرولینا اور مسیسیپی جیسی ریپبلکن کی مضبوط ریاستوں میں بھی پارٹی کی ہار ہوئی ہے۔ گروٹرز کے حمایتی لارین لیپیج نے ان کے کاموں کی ستائش کی ہے۔ انہوں نے کہا ہے کہ گروٹرز نے ان کی مدد کی، جس وجہ سے ان کے والد پال لیپیج کانگریس کی سیٹ جیت سکے۔ یہ انتخاب میں پارٹی کے لیے اچھی خبر ہے۔


گروٹرز نے بتایا کہ گولف ٹورنامنٹ پریسیڈنٹ کپ میں مہمانوں کے لیے مقامات کے انتظامات میں 22500 ڈالر خرچ ہوئے، جس میں 25 لاکھ ڈالر کا نیا چندہ ملا۔ کیرولین وائلز کو ان کے پیشرو مائیکل وٹلی نے 6 ماہ کے لیے رکھا تھا۔ ان کا معاہدہ گروٹرز کے صدر منتخب ہونے پر ختم ہو گیا۔ انہوں نے ٹرمپ، نائب صدر جے ڈی وینس اور سابق پریس سکریٹری کیرولین لیوٹ کے بال بنوانے اور میک اَپ پر ہونے والے اخراجات کا دفاع کرتے ہوئے کہا کہ اس سے سرکاری خزانے پر کوئی بوجھ نہیں پڑا۔ گروٹرز نے ارکان سے فون پر بات کر کے ان کی شکایات بھی سنیں۔ آر این سی کے نئے چیئرمین کا انتخاب جنوری میں ایریزونا میں ہونے والی میٹنگ میں کیا جائے گا۔ پارٹی کے اندر جاری اختلاف 2028 کے صدارتی انتخابات کی تیاریوں کو بھی متاثر کر سکتے ہیں






بی جے پی ریزرویشن ختم کرنا چاہتی ہے، ذات پر مبنی مردم شماری سے ہی سماجی انصاف کی راہ کھلے گی: اکھلیش یادو


قومی آواز بیورو

قومی آواز بیورو


لکھنؤ: اتر پردیش میں 2027 کے اسمبلی انتخابات سے قبل سیاسی سرگرمیاں تیز ہونے لگی ہیں۔ اسی دوران سماج وادی پارٹی (ایس پی) کے سربراہ اور ریاست کے سابق وزیر اعلیٰ اکھلیش یادو نے بھارتیہ جنتا پارٹی (بی جے پی) کو نشانہ بناتے ہوئے الزام لگایا ہے کہ وہ ریزرویشن ختم کرنا چاہتی ہے۔ انہوں نے مطالبہ کیا کہ حکومت ملک میں ذات پر مبنی مردم شماری کرائے، تاکہ سماجی انصاف کی راہ ہموار ہو اور آبادی کے تناسب سے تمام طبقات کو ان کے حقوق اور احترام مل سکے۔


اکھلیش یادو نے پیر کو صحافیوں سے بات چیت کے دوران کہا کہ ملک ذات پر مبنی مردم شماری کا مطالبہ کر رہا ہے۔ ان کے مطابق، ذات کی بنیاد پر مردم شماری ہونے سے سماجی انصاف کا راستہ کھلے گا اور مختلف طبقات کی آبادی کے صحیح اعداد و شمار سامنے آئیں گے۔


انہوں نے بی جے پی حکومت پر ریزرویشن کے نظام کو کمزور کرنے کا الزام عائد کرتے ہوئے کہا کہ یہ ایسی جماعت ہے جس نے لیٹرل انٹری کے ذریعے ریزرویشن چھینا ہے۔ انہوں نے دعویٰ کیا کہ سرکاری ملازمتوں میں بھی ریزرویشن کے حقوق متاثر کیے گئے ہیں۔




سماج وادی پارٹی کے سربراہ نے سرکاری اسکولوں کی بندش اور ملازمتوں کے امتحانات میں پرچہ لیک ہونے کے واقعات کو بھی حکومت کی ناکامی قرار دیا۔ ان کا کہنا تھا کہ 26 ہزار سے زیادہ اسکول بند کر دیے گئے ہیں، جبکہ نوجوانوں کو جو سرکاری ملازمتیں ملنی چاہئیں تھیں، ان کے امتحانات کے پرچے لیک کرا دیے گئے۔


اکھلیش یادو نے کہا کہ یہ حکومت سماجی انصاف کے اصولوں کے مطابق کام نہیں کرنا چاہتی۔ انہوں نے سوال اٹھایا کہ ایسی حکومت سے سماجی انصاف کی امید کیسے کی جا سکتی ہے۔ ان کے مطابق، حکومت کو ذات پر مبنی مردم شماری کے ذریعے مختلف سماجی طبقات کی آبادی کا تعین کرنا چاہیے اور اسی تناسب سے انہیں عزت، حقوق اور مواقع فراہم کرنے چاہئیں۔


سیاسی مبصرین کے نزدیک اکھلیش یادو کا یہ بیان اتر پردیش میں آئندہ اسمبلی انتخابات کے پیش نظر اہمیت رکھتا ہے۔ سماج وادی پارٹی پہلے بھی ذات پر مبنی مردم شماری اور پسماندہ طبقات کو آبادی کے تناسب سے حقوق دینے کے مطالبات کو اپنے سیاسی ایجنڈے کا اہم حصہ بناتی رہی ہے۔


واضح رہے کہ اتر پردیش میں اگلے اسمبلی انتخابات 2027 میں ہونے ہیں۔ انتخابات سے قبل ریاست میں سیاسی جماعتوں نے ایک دوسرے پر حملے تیز کر دیے ہیں اور ریزرویشن، سماجی انصاف، روزگار اور ذات پر مبنی مردم شماری جیسے موضوعات ایک بار پھر سیاسی بحث کے مرکز میں آ گئے ہیں۔





سپریم کورٹ میں انڈیا اتحاد کا نیا جواب داخل، چیف الیکشن کمشنر گیانیش کمار سے 48 سوالات پوچھنے کی اجازت طلب


قومی آواز بیورو

قومی آواز بیورو


نئی دہلی: چیف الیکشن کمشنر (سی ای سی) گیانیش کمار اور انتخابی کمیشن کے کام کاج سے متعلق معاملے میں انڈیا اتحاد کے رہنماؤں نے سپریم کورٹ میں نیا جواب داخل کیا ہے۔ کانگریس رہنما راہل گاندھی سمیت دیگر درخواست گزاروں نے انتخابی کمیشن کے حلف نامے پر عدم اطمینان ظاہر کرتے ہوئے چیف الیکشن کمشنر، دونوں انتخابی کمشنروں اور کمیشن کے ڈائریکٹر جنرل (آئی ٹی) سے 48 سوالات پوچھنے کی اجازت طلب کی ہے۔ اس معاملے پر سپریم کورٹ میں منگل، 17 نومبر کو سماعت ہونی ہے۔


درخواست گزاروں نے اپنے تازہ جواب میں انتخابی کمیشن کے فیصلے لینے کے طریقۂ کار، ووٹر لسٹوں کے خصوصی گہری نظرثانی (ایس آئی آر) اور ڈیجیٹل نظام میں کی گئی تبدیلیوں سے متعلق کئی اہم سوالات اٹھائے ہیں۔ ان کا کہنا ہے کہ انتخابی کمیشن نے اپنے حلف نامے میں دعویٰ کیا ہے کہ تمام فیصلے اتفاق رائے سے اور سرکاری فائلوں کے ذریعے کیے گئے، لیکن حق اطلاعات (آر ٹی آئی) کے تحت حاصل ہونے والی معلومات سے بعض معاملات میں باضابطہ فیصلے نہ ہونے کا اشارہ ملتا ہے۔


درخواست میں پوچھا گیا ہے کہ ایسے کتنے مواقع آئے جب چیف الیکشن کمشنر کی رائے سے دیگر دونوں انتخابی کمشنر متفق نہیں تھے۔ اس کے علاوہ یہ بھی جاننا چاہا گیا ہے کہ ملک بھر میں بیک وقت ایس آئی آر کرانے کا حتمی فیصلہ کس نے کیا تھا اور نئے ووٹروں کے اندراج کے لیے فارم 6 کے فارمیٹ اور قواعد میں تبدیلی کس کے حکم پر کی گئی۔




درخواست گزاروں نے انتخابی کمیشن کے ڈیجیٹل نظام ایرو نیٹ اور ای سی آئی نیٹ کو مرکزی سطح پر مربوط کرنے کے فیصلے پر بھی وضاحت طلب کی ہے۔ ان کا سوال ہے کہ یہ فیصلہ کس نے کیا اور اس کے لیے کون سا تکنیکی طریقۂ کار اختیار کیا گیا۔ اس کے ساتھ ہی یہ بھی پوچھا گیا ہے کہ انتخابی کمیشن کی جانب سے داخل مشترکہ حلف نامے کو چیف الیکشن کمشنر اور دونوں انتخابی کمشنروں نے کب اور کس طریقۂ کار کے تحت منظوری دی تھی۔


درخواست میں مغربی بنگال میں عدالتی افسران کے فیصلوں کے خلاف بڑے پیمانے پر اپیلیں دائر کیے جانے کا معاملہ بھی اٹھایا گیا ہے۔ درخواست گزاروں نے انتخابی کمیشن کے اس دعوے پر سوال کیا ہے کہ یہ اپیلیں کمیشن کی معلومات اور اجازت کے بغیر دائر کی گئی تھیں۔


قانونی بنیاد کے طور پر درخواست گزاروں نے آئین کے آرٹیکل 32 اور سپریم کورٹ کے قواعد کا حوالہ دیا ہے۔ انہوں نے جسٹس کے ایس پٹاسوامی مقدمے کا ذکر کرتے ہوئے کہا ہے کہ تکنیکی اور طریقۂ کار سے متعلق حقائق واضح کرنے کے لیے متعلقہ حکام سے براہ راست سوالات کیے جا سکتے ہیں۔


درخواست میں عدالت سے مطالبہ کیا گیا ہے کہ متعلقہ عہدیداروں کو 48 سوالات کے جوابات سرکاری ریکارڈ کی بنیاد پر حلف نامے کے ذریعے داخل کرنے کی ہدایت دی جائے۔ ساتھ ہی یہ بھی کہا گیا ہے کہ اگر کسی دستاویز کو خفیہ قرار دے کر فراہم کرنے سے انکار کیا جاتا ہے تو اس کی قانونی بنیاد بھی واضح کی جائے۔