اویسی اور چندرشیکھر پر اکھلیش کا حملہ، کہا- ’سیاست کے سیاح‘ انتخابات قریب آتے ہی سرگرم
قومی آواز بیورو
قومی آواز بیورو
آگرہ: سماج وادی پارٹی (ایس پی) کے قومی صدر اکھلیش یادو نے آل انڈیا مجلس اتحاد المسلمین (اے آئی ایم آئی ایم) کے سربراہ اسدالدین اویسی اور آزاد سماج پارٹی (کانشی رام) کے رہنما چندرشیکھر آزاد کو نشانہ بناتے ہوئے الزام لگایا ہے کہ انتخابات قریب آتے ہی سرگرم ہونے والے ’سیاست کے سیاحوں‘ کی ڈور بھارتیہ جنتا پارٹی (بی جے پی) کے ہاتھ میں ہے۔ انہوں نے کہا کہ انہیں جتنی ڈھیل دی جائے گی، وہ اتنا ہی آگے بڑھیں گے۔
اکھلیش یادو اتوار کو آگرہ میں منعقدہ ’پی ڈی اے دلت کانفرنس‘ سے خطاب کر رہے تھے۔ انہوں نے حال ہی میں سماجی تبدیلی مورچہ تشکیل دینے والی اویسی کی اے آئی ایم آئی ایم اور چندرشیکھر آزاد کی آزاد سماج پارٹی کی طرف اشارہ کرتے ہوئے کہا کہ بی جے پی کے حالیہ انتخابات میں شکست کے بعد کئی ’سیاست کے سیاح‘ بھی سرگرم ہوگئے ہیں۔
انہوں نے کہا، ’’یہ آگرہ ہے، جہاں بڑی تعداد میں سیاح آتے ہیں۔ لوگ سمجھ رہے ہوں گے کہ جیسے ہی انتخابات قریب آئے، سیاست کے سیاح بھی آگئے۔ ان کا او ٹی پی کہیں اور سے آرہا ہے اور وہ کسی دوسرے کے مائیک کے لاؤڈ اسپیکر بن گئے ہیں۔‘‘
اکھلیش یادو نے ان سیاسی جماعتوں اور رہنماؤں کے بارے میں دعویٰ کیا کہ ان کی کمان کہیں اور ہے۔ اے آئی ایم آئی ایم کے انتخابی نشان پتنگ کا حوالہ دیتے ہوئے انہوں نے کہا، ’’ان سیاست کے سیاحوں کی ڈور کہیں اور ہے اور چرخی بھی کہیں اور ہے۔ یہ اتنا ہی اڑیں گے، جتنی انہیں ڈھیل دی جائے گی۔‘‘
ایس پی صدر نے کہا کہ پہلے بی جے پی کے رہنما پی ڈی اے کی تعریف بیان کرتے تھے، لیکن اب نئے سیاسی رہنما بھی اس کی تشریح کرنے لگے ہیں۔ ان کے مطابق یہ لوگ پی ڈی اے کی سیاست کو سمجھ نہیں پائے ہیں۔ انہوں نے طنزیہ انداز میں کہا کہ کچھ لوگ کہہ رہے ہیں کہ ’پلٹ دیے اکھلیش‘، لیکن اس بار آگرہ کے لوگ بھی انہیں پلٹ دیں گے۔
اس سے قبل ایس پی کے قومی جنرل سکریٹری رام گوپال یادو نے بھی الزام لگایا کہ بی جے پی پسماندہ طبقات، دلتوں اور اقلیتوں (پی ڈی اے) کی یکجہتی توڑنے کے لیے بعض سیاسی جماعتوں اور افراد کو مالی مدد فراہم کر رہی ہے۔ انہوں نے کہا کہ لوک سبھا انتخابات میں پی ڈی اے کی متحدہ طاقت کے سبب بی جے پی کو شکست کا سامنا کرنا پڑا تھا اور اسی سے گھبرا کر وہ اس اتحاد میں پھوٹ ڈالنے کی سازش کر رہی ہے۔
رام گوپال یادو نے اویسی اور چندرشیکھر کی جانب سے تشکیل دیے گئے ’سماجی تبدیلی مورچہ‘ کی طرف اشارہ کرتے ہوئے الزام لگایا کہ بعض لوگوں کو پیسے دے کر اور کچھ کو ڈرا دھمکا کر بی جے پی کی کٹھ پتلی کے طور پر استعمال کیا جا رہا ہے۔ انہوں نے پی ڈی اے طبقے کے لوگوں سے ایسی کوششوں کے خلاف محتاط رہنے کی اپیل کی۔
انہوں نے مزید دعویٰ کیا کہ بی جے پی یا اس کی حامی جماعتوں کے ٹکٹ پر منتخب ہونے والے پسماندہ اور دلت طبقوں کے نمائندوں نے اپنے سماج کے حقوق کے مبینہ استحصال کے خلاف کبھی آواز نہیں اٹھائی۔ ان کے مطابق پارلیمنٹ میں آئین کو لاحق خطرات اور پسماندہ و دلت طبقات کے ریزرویشن کے معاملے پر بھی ایسے نمائندوں نے خاموشی اختیار کیے رکھی۔
کیرلم: وزیر خزانہ نرملا سیتارمن کے نام پر دھوکہ دہی، جعلی ویڈیو کے جال میں پھنس کر بزرگ نے گنوائے 1.41 کروڑ روپے!
قومی آواز بیورو
قومی آواز بیورو
کیرلم کے کوژیکوڈ میں ایک 63 سالہ شخص نے ایک فرضی آن لائن ٹریڈنگ پلیٹ فارم میں سرمایہ کاری کرکے 1.41 کروڑ روپے گنوا دیے۔ ایک ایجنسی کے مطابق اس پلیٹ فارم کی تشہیر ایک جعلی ویڈیو کے ذریعے کی گئی تھی، جس میں مرکزی وزیر خزانہ نرملا سیتارمن کو دکھایا گیا تھا۔ کوژیکوڈ رورل سائبر کرائم پولیس نے ہفتے کے روز نادوونور کے نوچاد باشندہ عبدالرحیمن پی کی شکایت پر ایف آئی آر درج کی۔
پولیس کے مطابق شکایت کنندہ نے ’فیس بک‘ پر ایک ویڈیو دیکھی، جس میں مبینہ طور پر نرملا سیتارمن کو آن لائن ٹریڈنگ کے ذریعے اچھے منافع کا وعدہ کرتے ہوئے دکھایا گیا تھا۔ پولیس نے بتایا کہ ویڈیو کو اصلی سمجھ کر انہوں نے اس کے ساتھ دیے گئے ایک لنک پر کلک کیا اور جعل سازوں کی ہدایات پر عمل کیا۔ افسران نے بتایا کہ یہ مبینہ دھوکہ دہی 6 جون 2025 سے 4 نومبر 2026 کے درمیان ہوئی۔ اس دوران متاثرہ شخص نے اپنے 2 بینک کھاتوں سے 30 مرتبہ مجموعی طور پر 1.41 کروڑ روپے ملزمین کے زیر انتظام مختلف بینک کھاتوں میں منتقل کیے۔ افسران کے مطابق نہ تو وعدے کے مطابق منافع ملا اور نہ ہی سرمایہ کاری کی گئی رقم واپس آئی، جس کے بعد انہوں نے پولیس سے رابطہ کیا۔
پولیس نے بتایا کہ شکایت کنندہ نے واقعے کی اطلاع دینے میں تاخیر کی، کیونکہ انہیں امید تھی کہ ان کی رقم واپس مل جائے گی۔ سائبر کرائم پولیس نے بھارتیہ نیائے سنہتا کی دفعہ 318(4) اور انفارمیشن ٹیکنالوجی ایکٹ کی دفعہ 66 ڈی کے تحت مقدمہ درج کیا ہے۔ اب تک ملزمین کی شناخت نہیں ہو سکی ہے۔ پولیس نے بتایا کہ مختلف بینک کھاتوں میں منتقل کی گئی رقم اور شکایت کنندہ کو موصول ہونے والی فون کالز کی بنیاد پر ملزمین کا سراغ لگانے کی کوشش کی جا رہی ہے۔ پولیس کے مطابق جلد ہی ملزمین کا پتہ لگا لیا جائے گا اور پورے معاملے کا انکشاف کر دیا جائے گا۔
پہلے 36 گھنٹے تک سروس ٹھپ رہی، اب ہیکرز کا خطرہ، مائیکروسافٹ نے جاری کی وارننگ!
قومی آواز بیورو
قومی آواز بیورو
مائیکروسافٹ کو ایک بڑے سروس آؤٹیج کا سامنا کرنا پڑا ہے، جس کی وجہ سے مائیکروسافٹ کی کئی سروسز 36 گھنٹوں تک بند رہی تھیں۔ اس دوران مائیکروسافٹ کے صارفین آؤٹ لک، ٹیمز اور کئی آفس ایپس کا استعمال نہیں کر پا رہے تھے۔ اب مائیکروسافٹ نے ایک اہم اطلاع شیئر کرتے ہوئے بتایا ہے کہ ہیکرز سروس آؤٹیج کا فائدہ اٹھا کر لوگوں کو نشانہ بنانے کی کوشش کر رہے ہیں۔ اس کے ذریعے وہ صارفین کے لاگ ان پاس ورڈ چرانے کی کوشش کر رہے ہیں۔ اس میں بینک کھاتوں سے متعلق معلومات بھی شامل ہو سکتی ہیں۔
مائیکروسافٹ نے سائبر ہیکرز کی ایک نئی مہم کے حوالے سے معلومات شیئر کی ہیں۔ اس میں بتایا گیا ہے کہ ہیکرز مائیکروسافٹ کی سروسز بند ہونے کا فائدہ اٹھا کر لوگوں کو خطرناک لنکس والے پیغامات بھیج رہے ہیں اور انہیں کلک کرنے کے لیے کہہ رہے ہیں۔ مائیکروسافٹ تھریٹ انٹیلی جنس نے سوشل میڈیا پلیٹ فارم ’ایکس‘ پر ایک پوسٹ شیئر کی ہے اور سائبر ٹھگوں کی اس چال کے بارے میں بتایا ہے۔ ہیکرز مائیکروسافٹ کی سروس نوٹیفکیشنز کی نقل کر رہے ہیں۔ ہیکرز معصوم صارفین کو یہ بتا رہے ہیں کہ سروس آؤٹیج کے دوران روکی گئی ای میلز جلد ہی ڈیلیٹ ہو سکتی ہیں۔ جبکہ کمپنی نے واضح کیا ہے کہ یہ پیغامات مائیکروسافٹ کی جانب سے نہیں بھیجے گئے ہیں۔
مائیکروسافٹ نے بتایا ہے کہ ہیکرز سروس آؤٹیج کا فائدہ اٹھا کر لوگوں کے لیپ ٹاپ اور اسمارٹ فونز میں نقب لگانا چاہتے ہیں۔ اس کے ذریعے صارفین کے لاگ ان اور پاس ورڈ سے متعلق تفصیلات حاصل کرنے کی کوشش کر رہے ہیں۔ مائیکروسافٹ نے بتایا ہے کہ کچھ صارفین کو جعلی ای میلز موصول ہو رہی ہیں، جس میں کہا جا رہا ہے کہ سروس آؤٹیج کی وجہ سے کچھ پیغامات روک دیے گئے تھے اور اگر صارفین ان پیغامات کو دوبارہ حاصل کرنا چاہتے ہیں، تو دیے گئے لنک پر کلک کریں، ورنہ 24 گھنٹے کے اندر ای میلز اور پیغامات ڈیلیٹ کر دیے جائیں گے۔
ایسی صورت میں صارفین جلدبازی کرتے ہیں اور ہیکرز کا شکار ہو جاتے ہیں۔ ہیکرز چاہتے ہیں کہ لوگ نوٹیفکیشن کی جانچ کیے بغیر ہی اس میں دیے گئے لنک پر کلک کر دیں۔ اگر آپ کو بھی ایسا کوئی پیغام موصول ہوتا ہے تو اس سے محتاط رہیں۔ مائیکروسافٹ نے اس فشنگ مہم سے منسلک بھیجنے والے ڈومینز کی شناخت کی ہے۔ ان میں مومنٹس نوٹس ڈاٹ کام، پلانیٹ میزن ڈاٹ کام اور نیو بُکر ڈاٹ کام کے نام شامل ہیں۔ مائیکروسافٹ نے اپنے صارفین کو مشورہ دیا ہے کہ وہ فرضی ای میل یا پیغام میں دیے گئے لنک پر کلک نہ کریں۔ کسی بھی نامعلوم لنک پر کلک کرنے سے گریز کرنا چاہیے، کیونکہ یہ سائبر ٹھگوں کی چال ہو سکتی ہے اور اس کی وجہ سے کئی لوگوں کے فون یا لیپ ٹاپ ہیک ہو سکتے ہیں۔
اقوام متحدہ میں سزائے موت پر روک کی قرارداد منظور، ہندوستان اور امریکہ سمیت 33 ممالک نے مخالفت کی
قومی آواز بیورو
قومی آواز بیورو
دنیا کے 133 ممالک نے سزائے موت پر روک لگانے کی حمایت کی، لیکن ہندوستان اس مطالبے کے حق میں نہیں کھڑا ہوا۔ اقوام متحدہ کی جنرل اسمبلی میں جمعہ کو اس معاملے پر ووٹنگ ہوئی۔ ہندوستان نے قرارداد کے خلاف ووٹ دیا۔ امریکہ، چین اور پاکستان سمیت 33 ممالک نے بھی اس کی مخالفت کی۔ تاہم، مخالفت کے باوجود قرارداد منظور ہو گئی۔ یہ قرارداد میکسیکو نے پیش کی تھی۔ اس میں تمام ممالک سے اپیل کی گئی تھی کہ وہ پھانسی دینے پر روک لگائیں۔ اس کا مقصد بتدریج سزائے موت ختم کرنے کی سمت آگے بڑھنا تھا۔ اقوام متحدہ کے 193 رکن ممالک میں سے 133 نے قرارداد کی حمایت کی، 33 نے مخالفت میں ووٹ دیا، جبکہ 16 ممالک ووٹنگ سے دور رہے۔
ہندی نیوز پورٹل ’آج تک‘ پر شائع خبر کے مطابق ہندوستان نے جن ممالک کے ساتھ قرارداد کی مخالفت کی ان میں امریکہ، چین، پاکستان، جاپان، ایران، عراق، سعودی عرب، مصر، بحرین، کویت، مالدیپ، عمان اور قطر شامل ہیں۔ قرارداد میں کہا گیا تھا کہ ہر ملک کو اپنے قوانین بنانے اور سزا طے کرنے کا حق حاصل ہے۔ ساتھ ہی تمام ممالک سے اپیل کی گئی تھی کہ وہ پھانسی دینے پر روک لگائیں۔ جن ممالک میں سزائے موت ختم کی جا چکی ہے، ان سے اسے دوبارہ نافذ نہ کرنے کی بھی اپیل کی گئی۔
اس قرارداد میں یہ بھی کہا گیا کہ 18 سال سے کم عمر میں جرم کرنے والے افراد کو سزائے موت نہیں دی جانی چاہیے۔ اگر جرم کے وقت کسی شخص کی عمر کا تعین کرنا ممکن نہ ہو، تب بھی اسے سزائے موت نہ دینے کی اپیل کی گئی۔ اس کے علاوہ حاملہ خواتین، ذہنی یا فکری معذوری کے شکار افراد اور بزرگوں کو بھی اس سزا سے مستثنیٰ رکھنے کی بات کہی گئی۔ قرارداد میں یہ مطالبہ بھی کیا گیا تھا کہ ان جرائم کی تعداد کم کی جائے جن کے لیے سزائے موت دی جا سکتی ہے۔ ایسے قوانین ختم کرنے کی بھی اپیل کی گئی جن کے تحت کسی جرم کے لیے سزائے موت دینا لازمی ہوتا ہے۔
قرارداد میں دنیا بھر میں پھانسی کی سزا جاری رہنے پر تشویش ظاہر کی گئی۔ اس میں کہا گیا کہ کئی ممالک سزائے موت کے استعمال کو محدود کرنے کی سمت آگے بڑھ رہے ہیں، لیکن 2025 میں ریکارڈ کیے گئے پھانسی کے واقعات میں کافی اضافہ ہوا۔ قرارداد کے ذریعے تمام ممالک سے سزائے موت کا استعمال بتدریج کم کرنے اور پھانسی پر روک لگانے کی اپیل کی گئی تھی۔
نیتن یاہو نے ایرانی جوہری خطرات سے تحفظ کے لیے اسرائیل میں قومی اتحاد کی حکومت کو لازمی قرار دیا
قومی آواز بیورو
قومی آواز بیورو
اسرائیل کے وزیر اعظم بنجامن نیتن یاہو نے ایک بار پھر قومی اتحاد کی حکومت تشکیل دینے کی اپیل کی ہے۔ انہوں نے دعویٰ کیا ہے کہ ایران کی جانب سے اپنے جوہری پروگرام کو دوبارہ فعال کرنے کی کوشش اسرائیل کے وجود کے لیے خطرہ بن سکتی ہے۔ ان خطرات سے نمٹنے کے لیے ملک کی تمام اہم سیاسی جماعتوں کو متحد ہونا ہوگا۔ ہفتہ کے روز (مقامی وقت کے مطابق) پہلے سے ریکارڈ کیے گئے ایک خطاب میں نیتن یاہو نے اپنے سیاسی حریف گادی آئزن کوٹ (جنہیں اسرائیل کی اگلی حکومت تشکیل دینے کی ذمہ داری سونپی گئی ہے) سے اپیل کی کہ وہ کسی بھی پیشگی شرط کے بغیر اتحاد کے سلسلے میں مذاکرات میں شامل ہوں۔
بنجامن نیتن یاہو نے الزام عائد کیا ہے کہ ایران کی حکومت ایک بار پھر اپنے جوہری پروگرام کو آگے بڑھانے میں مصروف ہے۔ جوہری ہتھیاروں کی تیزی سے تیاری کی صورت میں اسرائیل کے وجود کو خطرہ لاحق ہو سکتا ہے۔ نیتن یاہو کے مطابق اسرائیل کو اس خطرے کو روکنے کے لیے ہر ممکن کوشش کرنی ہوگی۔ نیتن یاہو نے اپنے بیان میں ایم کلاوی اور شاگات ہاری کے نام سے فوجی کارروائیوں کا ذکر کرتے ہوئے دعویٰ کیا ہے کہ ان کارروائیوں کے ذریعے اسرائیل نے فوری تباہی کے خطرے کو ٹال دیا تھا۔ آئزن کوٹ کے ساتھ جمعرات کے روز ہونے والی ملاقات کے بعد نیتن یاہو نے ہفتہ کے روز یہ ویڈیو جاری کی تھی۔
اکتوبر میں ہوئے انتخابات میں نیتن یاہو کے دائیں بازو کے اتحاد نے پارلیمنٹ میں اپنی اکثریت کھو دی تھی۔ اس کے بعد صدر اسحاق ہرزوگ نے سابق فوجی سربراہ آئزن کوٹ کو حکومت تشکیل دینے کے لیے 28 دنوں کا وقت دیا، جسے ضرورت پڑنے پر مزید 14 دنوں تک بڑھایا جا سکتا ہے۔ نئی حکومت کی تشکیل تک نیتن یاہو اپنے عہدے پر برقرار رہیں گے۔ اسرائیل کی نو منتخب پارلیمنٹ کے پہلے اجلاس سے خطاب کرتے ہوئے نیتن یاہو نے خبردار کیا کہ ملک کو جلد ہی بڑے بین الاقوامی دباؤ کا سامنا کرنا پڑ سکتا ہے۔ یہ دباؤ ایران کو جوہری ہتھیاروں سے لیس ملک کے طور پر تسلیم کرنے اور وہاں کی موجودہ حکومت کو برقرار رکھنے کے لیے ڈالا جا سکتا ہے۔ نیتن یاہو نے الزام عائد کیا ہے کہ ایران کی موجودہ حکومت اسرائیل کے وجود کے لیے خطرہ ہے۔
نیتن یاہو نے کہا کہ بہت جلد ہمیں ایسے بین الاقوامی دباؤ کا سامنا کرنا پڑ سکتا ہے، جس کے تحت ہم سے ایران کو جوہری ہتھیاروں سے لیس ملک کے طور پر تسلیم کرنے اور اس دہشت گرد حکومت کو برقرار رکھنے کے لیے کہا جائے گا، جو ہمیں مکمل طور پر ختم کرنا چاہتی ہے۔ حالانکہ ان کے اس بیان پر اسرائیلی دفاعی افواج (آئی ڈی ایف) کے سابق سربراہ گادی آئزن کوٹ نے سخت ردعمل ظاہر کیا۔ انہوں نے نیتن یاہو پر الزام عائد کیا کہ وہ ایک اہم قومی مواقع کو اپنے سیاسی مفادات پورے کرنے کے لیے استعمال کر رہے ہیں۔ نیتن یاہو کی تقریر کو شرمناک قرار دیتے ہوئے آئزن کوٹ نے سوال اٹھایا کہ کیا وہ اس عہدے پر برقرار رہنے کے بھی اہل ہیں؟
0 تبصرے