’میرے ساتھ ڈیبیٹ کے بعد نریندر مودی وزیر اعظم نہیں رہ پائیں گے‘، راہل گاندھی نے پھر ظاہر کی مباحثہ کی خواہش


قومی آواز بیورو

قومی آواز بیورو


لوک سبھا میں حزب اختلاف کے قائد راہل گاندھی نے ایک بار پھر وزیر اعظم نریندر مودی کے ساتھ ’وَن-ٹو-وَن‘ مباحثہ کی خواہش ظاہر کی ہے۔ دراصل وہ چاہتے ہیں کہ بغیر کسی رخنہ کے پی ایم مودی ان سے کسی بھی ایشو پر بحث کریں، حالانکہ ان کے ذریعہ دیے گئے ’ڈیبیٹ چیلنج‘ پر وزیر اعظم یا ان کے دفتر سے کوئی رد عمل سامنے نہیں آیا۔ بی جے پی لیڈران یہ ضرور کہتے نظر آئے کہ راہل گاندھی پارلیمنٹ میں پی ایم مودی سے بحث کریں، عوامی پلیٹ فارم پر بحث کی ضرورت نہیں۔



دراصل سوشل میڈیا پلیٹ فارم ’انسٹاگرام‘ پر ایک صارف نے راہل گاندھی سے سوال کیا کہ ’بی جے پی کہہ رہی ہے بحث پارلیمنٹ میں کرو، آپ پبلک ڈیبیٹ پر ہی کیوں بضد ہو؟‘ اس کا جواب دیتے ہوئے راہل گاندھی نے کہا کہ انھوں نے پارلیمنٹ میں کئی ایشوز پر بحث کرنے کی کوشش کی، لیکن انھیں بولنے کا موقع نہیں دیا گیا۔ ان کا الزام ہے کہ کئی مواقع پر ان کا مائک بند کر دیا گیا۔




اس جواب کی ویڈیو کانگریس نے اپنے آفیشیل ’ایکس‘ ہینڈل پر شیئر کی ہے، جس میں راہل گاندھی کہتے نظر آ رہے ہیں کہ وہ وزیر اعظم کے ساتھ آمنے سامنے بحث کرنے کے لیے تیار ہیں، اس کے لیے بی جے پی اپنی پسند کا کوئی بھی شخص جج کی شکل میں منتخب کر سکتی ہے۔ انھوں نے دعویٰ کیا کہ اس بحث کے بعد وزیر اعظم مودی وزیر اعظم نہیں رہ پائیں گے۔ پارلیمنٹ میں بحث سے متعلق راہل گاندھی کہتے ہیں کہ ’’میں نے کسان بل پر بات کرنے کی کوشش کی، لیکن مجھے بولنے نہیں دیا گیا۔ میں نے ایس آئی آر اور چین کے معاملے پر بولنے کی کوشش کی، میں نے نرونے کی کتاب پر بحث کرنے کے لیے کہا، لیکن مجھے موقع نہیں دیا گیا۔‘‘


راہل گاندھی نے وزیر اعظم مودی کے ساتھ آمنے سامنے والی بحث کرنے کی خواہش ظاہر کرتے ہوئے کہا کہ وہ کسی بھی پلیٹ فارم پر بحث کے لیے تیار ہیں۔ اس کے لیے بی جے پی چاہے تو اڈانی اور موہن بھاگوت کو جج کی شکل میں بٹھا سکتی ہے۔ انھوں نے کہا کہ ’’میں وَن آن وَن ڈیبیٹ کرنا چاہتا ہوں۔ وہ جج کی شکل میں کسی کو بھی رکھ سکتے ہیں۔ وہ اڈانی اور بھاگوت کو بھی جج بنا سکتے ہیں۔ لیکن میں گارنٹی کے ساتھ کہہ رہا ہوں کہ میرے ساتھ بحث کے بعد نریندر مودی وزیر اعظم نہیں رہ پائیں گے۔‘‘





امریکہ میں بچے کی پیدائش کے ذریعے شہریت حاصل کرنے کی کوششوں کے خلاف کارروائی، 6 ہزار سے زائد ویزے منسوخ


قومی آواز بیورو

قومی آواز بیورو


واشنگٹن: امریکہ نے بچے کی پیدائش کے ذریعے شہریت حاصل کرنے کے مقصد سے ملک کا سفر کرنے والے غیر ملکی شہریوں کے خلاف کارروائی تیز کر دی ہے۔ امریکی محکمہ خارجہ نے اب تک 6 ہزار سے زائد ایسے افراد کے ویزے منسوخ کر دیے ہیں، جو اس سرگرمی میں براہ راست ملوث تھے یا دوسروں کو اس کے لیے مدد فراہم کر رہے تھے۔


امریکی محکمہ خارجہ نے سوشل میڈیا پلیٹ فارم ایکس پر جاری بیان میں بتایا کہ محکمہ کی ’برتھ ٹورزم پریوینشن ٹاسک فورس‘ نے اب تک 6 ہزار سے زیادہ غیر ملکیوں کے ویزے منسوخ کیے ہیں۔ یہ افراد بچے کی پیدائش کے لیے امریکہ کا سفر کرنے یا اس عمل کو فروغ دینے میں ملوث تھے۔


محکمہ خارجہ نے اپنے بیان میں کہا کہ وہ اس سرگرمی میں ملوث ہر شخص کی شناخت کر رہا ہے اور اسے جواب دہ ٹھہرایا جائے گا۔ یہ تعداد 31 اکتوبر کو جاری کردہ اعداد و شمار سے زیادہ ہے، جب محکمہ خارجہ نے 4 ہزار سے زائد ویزے منسوخ کرنے کی اطلاع دی تھی۔ تاہم تازہ بیان میں یہ واضح نہیں کیا گیا کہ اس کے بعد کتنے مزید ویزے منسوخ کیے گئے ہیں۔


اس سے قبل اکتوبر میں محکمہ خارجہ نے بتایا تھا کہ بچے کی پیدائش کے ذریعے شہریت حاصل کرنے کے مقصد سے امریکہ کا سفر کرنے کے معاملے میں منسوخ کیے گئے ویزوں میں 700 سے زیادہ چینی شہریوں کے تھے۔ تاہم تازہ اعلان میں متاثرہ افراد کی قومیت کے حوالے سے کوئی تفصیلات فراہم نہیں کی گئیں۔




واضح رہے کہ ویزا منسوخ ہونے کا مطلب یہ نہیں ہے کہ متعلقہ شخص کو امریکہ سے ملک بدر کر دیا گیا ہے یا وہ کسی جرم کا مجرم قرار دیا جا چکا ہے۔ امریکی محکمہ خارجہ کے ضوابط کے مطابق، محض اس مقصد سے امریکہ کا سفر کرنا کہ وہاں بچے کی پیدائش کے ذریعے اسے امریکی شہریت حاصل ہو جائے، بی کیٹیگری کے نان امیگرنٹ ویزا کے اجرا کی جائز بنیاد نہیں ہے۔


ضابطے کے تحت اگر قونصلر افسر کو یہ یقین کرنے کی معقول وجہ ہو کہ خاتون امریکہ کے سفر کے دوران بچے کو جنم دے گی، تو اس کے ویزا درخواست دینے کے مقصد کے بارے میں ایک مفروضہ قائم کیا جا سکتا ہے۔ تاہم درخواست گزار کو اس مفروضے کو غلط ثابت کرنے کا موقع حاصل ہوتا ہے۔


امریکی محکمہ خارجہ نے 12 اگست کو اس سرگرمی کی روک تھام کے لیے خصوصی ٹاسک فورس قائم کی تھی۔ اس وقت محکمہ نے دنیا بھر میں 600 سے زائد ویزے منسوخ کرنے کی اطلاع دی تھی۔


بعد ازاں 23 ستمبر کو امریکی وزیر خارجہ مارکو روبیو نے ان افراد کے خلاف ویزا پابندیوں کا اعلان کیا تھا جو جان بوجھ کر بچے کی پیدائش کے ذریعے امریکی شہریت حاصل کرنے کی اس سرگرمی میں ملوث ہوتے ہیں یا دوسروں کو اس میں مدد فراہم کرتے ہیں۔ ان پابندیوں کا دائرہ بعض صورتوں میں متعلقہ افراد کے اہل خانہ تک بھی بڑھایا جا سکتا ہے۔ اس کے علاوہ محکمہ خارجہ نے ویزا فراڈ اور اس سرگرمی سے متعلق معلومات فراہم کرنے کے لیے ایک آن لائن پورٹل بھی شروع کیا ہے۔





’56 انچ کا سینہ اور حال بھیگی بلی جیسا‘، پی ایم مودی پر کانگریس کا طنز


قومی آواز بیورو

قومی آواز بیورو


کانگریس وزیر اعظم نریندر مودی پر لگاتار حملہ آور ہے۔ ایک طرف ان کی پالیسیوں کو تنقید کا نشانہ بنایا جا رہا ہے، اور دوسری طرف لوک سبھا میں حزب اختلاف کے قائد راہل گاندھی انھیں مسلسل ’کھلی بحث‘ کے لیے چیلنج پیش کر رہے ہیں۔ آج راہل گاندھی نے ایک بار پھر انھیں آمنے سامنے کی بحث کے لیے چیلنج پیش کیا، جس پر کانگریس لیڈر پون کھیڑا نے پی ایم مودی کے خوب مزے لیے ہیں۔



پون کھیڑا نے راہل گاندھی کی اس ویڈیو کو اپنے آفیشیل ’ایکس‘ ہینڈل پر شیئر کی ہے، جس میں وہ پی ایم مودی کو اوپن ڈیبیٹ کا چیلنج پیش کرتے ہوئے یہ بھی کہتے ہیں کہ وہ چاہیں تو ٹیلی پرامپٹر بھی ساتھ میں رکھ سکتے ہیں۔ اپنی پوسٹ میں کھیڑا لکھتے ہیں کہ ’’کچھ دن قبل کوئی کہہ رہے تھے کہ مودی جی بڑے خوفزد ہیں۔ میں نے پوچھا ’کیوں؟‘ کہنے لگے کہ- اِدھر راہل جی کا مقابلہ نہیں ہو پا رہا ہے، اور اُدھر (امریکہ میں) وسط مدتی انتخاب کے بعد ٹرمپ کا ہاتھ بھی سر سے اٹھتا ہوا نظر آ رہا ہے۔ مودی جی خود کو بڑا بے چارہ محسوس کر رہے ہیں!‘‘ پون کھیڑا نے اس معاملہ میں طنزیہ انداز اختیار کرتے ہوئے لکھا ہے کہ ’’یہ سب سن کر بہت برا لگا۔ 56 انچ کا سینہ اور حال بھیگی بلی جیسا!‘‘





قابل ذکر ہے کہ راہل گاندھی نے جو اپنی ویڈیو ’ایکس‘ پر شیئر کی تھی، اس میں سوال کیا تھا کہ ’’مودی جی، اپنی ہی گودی میڈیا کے دیوالی ملن میں بھی ٹیلی پرامپٹر؟ لوگ آپ کے، پلیٹ فارم آپ کا، ماحول آپ کا... پھر بھی اسکرپٹ چاہیے تھی! لگتا ہے دباؤ میں گھبرا گئے ہیں۔‘‘ ساتھ ہی وہ کہتے ہیں کہ ’’خیر، کوئی بات نہیں۔ مجھ سے بحث میں بھی ٹیلی پرامپٹر لے آئیے، جج بھی اپنی پسند کا بیٹھا لیجیے۔ بس آئیے تو سہی۔ ملک جاننا چاہتا ہے کہ حقیقی غدارِ وطن کون ہے؟‘‘





’مودی-اڈانی کی جوڑی نے ملک کا بہت نقصان کر دیا‘، ہائیڈرو پاور پروجیکٹ معاملہ میں نئے انکشاف پر کانگریس حملہ آور


قومی آواز بیورو

قومی آواز بیورو


اڈانی گروپ کی کمپنی ’اڈانی گرین انرجی لمیٹڈ‘ کے مہاراشٹر میں چل رہے ایک ہائیڈرو پاور پروجیکٹ پر کانگریس نے سوال اٹھا دیا ہے۔ انگریزی روزنامہ ’دی انڈین ایکسپریس‘ کی ایک رپورٹ کا حوالہ دیتے ہوئے کانگریس نے کہا ہے کہ ’’مودی-اڈانی کی جوڑی نے ملک کا بہت نقصان کر دیا۔‘‘ دراصل اس رپورٹ میں بتایا گیا ہے کہ اڈانی گرین انرجی لمیٹڈ نے مہاراشٹر کے ضلع ستارا میں مجوزہ 1500 میگاواٹ کے تارلی پمپڈ اسٹوریج پاور پروجیکٹ کی لاگت 5675 کروڑ روپے سے گھٹا کر محض 56.75 کروڑ روپے ظاہر کی ہے۔ اس قدم سے جنگلی حیات کے تحفظ کے لیے جمع کرائی جانے والی رقم بھی 227 کروڑ روپے سے گھٹ کر تقریباً 2.27 کروڑ روپے رہ گئی ہے۔



اس نئے انکشاف سے متعلق ’انڈین ایکسپریس ہندی‘ کی ایک مختصر ویڈیو کو اپنے آفیشیل ’ایکس‘ ہینڈل پر شیئر کرتے ہوئے کانگریس نے لکھا ہے کہ ’’مودی کے دوست اڈانی کا مزید ایک فراڈ سامنے آیا ہے۔ اڈانی گرین انرجی کو مہاراشٹر کے ستارا میں ایک ہائیڈرو پاور پروجیکٹ کا کام ملا ہے۔ یہ پروجیکٹ ’سہیادری ریزرو‘ کے علاقہ میں پڑتا ہے۔ محکمہ جنگلات کے اصول کے مطابق ایسے علاقہ میں پروجیکٹ لگانے والی کمپنی کو پروجیکٹ کے خرچ کا 4 فیصد جنگلاتی حیات کے تحفظ کے لیے جمع کرنا پڑتا ہے۔‘‘ آگے یہ بھی لکھا گیا ہے کہ ’’اڈانی نے پہلے اپنے اس ہائیڈرو پاور پروجیکٹ کا خرچ 5675 کروڑ روپے بتایا تھا۔ اس طرح اڈانی کو 4 فیصد رقم سہیادری ٹائیگر ریزرو کے اکاؤنٹ میں جمع کرانی تھی، جو کہ 227 کروڑ روپے ہوتی ہے۔‘‘




بنیادی حقائق کو سامنے رکھنے کے بعد کانگریس نے مبینہ دھوکہ کا ذکر اپنی سوشل میڈیا پوسٹ میں کیا ہے۔ پارٹی لکھتی ہے کہ ’’اڈانی نے یہیں پر جھول (دھوکہ) کر دیا۔ پروجیکٹ کے خرچ میں ایک پوائنٹ (.) لگا کر کروڑوں روپے کا گھوٹالہ کر دیا۔‘‘ اس پوسٹ میں مزید لکھا گیا ہے کہ ’’اڈانی کی کمپنی نے محکمہ جنگلات سے کہا کہ ہمارے پروجیکٹ کا خرچ 5675 کروڑ روپے نہیں ہے، صرف 56.75 کروڑ روپے ہے۔ ایسے میں 56.75 کروڑ روپے کا 4 فیصد 2.27 کروڑ روپے ہوا۔ کمال کی بات ہے کہ محکمہ جنگلات نے بھی یہ مان لیا اور فائلیوں میں ہائیڈرو پاور پروجیکٹ کا خرچ صرف 56.75 کروڑ روپے کر دیا گیا۔‘‘


اس معاملہ میں حملہ آور رخ اختیار کرتے ہوئے کانگریس نے کہا ہے کہ ’’جی ہاں، دنیا میں واحد اڈانی ہوگا جو محض 56.75 کروڑ روپے میں ہائیڈرو پاور پروجیکٹ بنا رہا ہے۔ یعنی پروجیکٹ کے خرچ میں ہیرا پھیری کر کے، ایک پوائنٹ لگا کر اڈانی نے تقریباً 225 کروڑ روپے بچا لیے اور اس دھوکہ بازیمیں محکمہ جنگلات بھی اڈانی کا ساتھ دے رہا ہے۔‘‘ کانگریس نے جارحانہ انداز اختیار کرتے ہوئے پی ایم مودی کو بھی نشانہ بنایا اور کہا کہ ’’سب کچھ صاف ہے، مودی نے اپنے متر (دوست) اڈانی کو ملک کو لوٹنے کی کھلی چھوٹ دے رکھی ہے اور اڈانی اس چھوٹ کا پورا فائدہ اٹھا رہا ہے۔ مودی-اڈانی کی جوڑی نے ملک کا بہت نقصان کر دیا۔‘‘





حکومت ہند نے ڈاکٹر ذاکر نائک کے ’اسلامک ریسرچ فاؤنڈیشن‘ پر پابندی میں مزید 5 سال کی توسیع کی


قومی آواز بیورو

قومی آواز بیورو


مرکزی حکومت نے اسلامی مبلغ ڈاکٹر ذاکر نائک کی قیادت والی ’اسلامک ریسرچ فاؤنڈیشن‘ (آئی آر ایف) پر عائد پابندی میں مزید 5 سال کی توسیع کر دی ہے۔ وزارت داخلہ نے 13 نومبر 2026 کو اس سلسلے میں نوٹیفکیشن جاری کیا۔ اس میں آئی آر ایف کو غیر قانونی تنظیم قرار دیتے ہوئے اس پر پابندی مزید 5 سال تک برقرار رکھنے کی ہدایت دی گئی ہے۔ تنظیم پر عائد موجودہ پابندی کی مدت 14 نومبر 2026 کو ختم ہو رہی تھی۔



وزارت داخلہ نے ہندوستان کے گزٹ میں شائع نوٹیفکیشن میں کہا ہے کہ آئی آر ایف کی سرگرمیاں ملک کی سلامتی، امن، فرقہ وارانہ ہم آہنگی اور سیکولر ڈھانچے کے لیے نقصان دہ ہیں۔ مرکزی حکومت نے غیر قانونی سرگرمیاں (روک تھام) ایکٹ، 1967 (یو اے پی اے) کی دفعہ 3 کے تحت یہ کارروائی کی ہے۔ نوٹیفکیشن کے مطابق مرکزی حکومت نے اس سے پہلے 17 نومبر 2016 اور 15 نومبر 2021 کو جاری نوٹیفکیشن کے ذریعہ آئی آر ایف کو غیر قانونی تنظیم قرار دیا تھا۔ اس کے بعد غیر قانونی سرگرمیاں (روک تھام) ایکٹ کی دفعہ 5 کے تحت تشکیل دیے گئے ٹریبونل نے بھی تنظیم پر پابندی عائد کرنے کے فیصلے کی توثیق کی تھی۔ ٹریبونل نے 22 مئی 2017 اور 30 مارچ 2022 کو جاری احکامات کے ذریعے حکومت کے فیصلوں کو درست قرار دیا تھا۔


وزارت داخلہ نے نوٹیفکیشن میں کہا ہے کہ حکومت کا ماننا ہے آئی آر ایف اور اس کے اراکین، خاص طور پر تنظیم کے بانی اور صدر ڈاکٹر ذاکر عبدالکریم نائک عرف ذاکر نائک، اپنے پیروکاروں کو مذہب کی بنیاد پر مختلف مذہبی طبقوں کے درمیان عداوت، نفرت اور بدگمانی پھیلانے کے لیے اکساتے ہیں۔ حکومت کے مطابق ذاکر نائک کی تقریریں اور بیانات قابل اعتراض اور اشتعال انگیز ہیں۔ ان کے ذریعہ مختلف مذہبی گروپوں کے درمیان نفرت اور عداوت کو فروغ دیا جارہا ہے۔ نوٹیفکیشن میں یہ الزام بھی لگایا گیا ہے کہ ان کی تقریریں ہندوستان اور بیرون ملک رہنے والے ایک مخصوص مذہب کے نوجوانوں کو دہشت گردانہ سرگرمیوں کے لیے اکسا سکتی ہیں۔