امریکہ: پیٹ ہیگسیتھ کے خلاف مواخذے کی کوشش ناکام، وزیر دفاع کے عہدے پر رہیں گے برقرار


قومی آواز بیورو

قومی آواز بیورو


امریکی وزیر دفاع پیٹ ہیگسیتھ کے خلاف مواخذے کی کارروائی شروع کرنے کی کوششیں ناکام ہو گئی ہیں۔ منگل کے روز ایوان نمائندگان میں حکمراں ریپبلکن پارٹی کے ارکان نے متحد ہو کر ہیگسیتھ کے خلاف مواخذے کی کوششوں کو روک دیا۔ ایوان نمائندگان میں مواخذے کی تجویز کو ریپبلکن قیادت والی ’ہاؤس جوڈیشری کمیٹی‘ کے پاس بھیجنے کے حق میں 211 اور مخالفت میں 204 ووٹ پڑے۔ اس قدم کے ساتھ ہی ہیگسیتھ کو عہدے سے ہٹانے کی کوششیں ناکام ہو گئی ہیں۔



مواخذے کی 8 تجاویز کو جوڈیشری کمیٹی کے پاس بھیجنے کی تجویز کینٹکی سے ریپبلکن رکن نمائندہ تھامس میسی نے پیش کی تھی۔ میسی واحد ریپبلکن رکن پارلیمنٹ تھے، جنہوں نے اس تجویز کے خلاف ووٹ دیا۔ میسی نے پہلے ہی خبردار کیا تھا کہ معاملے کو کمیٹی کے پاس بھیجنے سے مواخذے کی کوشش مکمل طور پر ختم ہو جائے گی۔ یہ ووٹنگ ایسے وقت میں ہوئی ہے، جب ریپبلکن پارٹی وسط مدتی انتخابات میں ہونے والی بڑی شکست کے نتائج سے نبرد آزما ہے۔ پارٹی کے کچھ رہنماؤں نے اس شکست کے لیے ایران جنگ اور اس کے نتیجے میں گیس کی قیمتوں میں ہونے والے بھاری اضافے کو ذمہ دار ٹھہرایا ہے۔ حالانکہ صدر ڈونالڈ ٹرمپ نے ہیگسیتھ کی مکمل حمایت کی، جس کے بعد پارٹی کے زیادہ تر ارکان پارلیمنٹ وزیر دفاع کے ساتھ کھڑے نظر آئے۔




ایوان کے اس فیصلے پر ٹرمپ نے بھی ردعمل ظاہر کیا ہے۔ انہوں نے کہا کہ ڈیموکریٹس کی مواخذے کی کوشش بری طرح ناکام ہو گئی ہے۔ ٹرمپ نے اپنے سوشل میڈیا پلیٹ فارم ’ٹروتھ سوشل‘ پر لکھا کہ وزیر دفاع پیٹ ہیگسیتھ کے خلاف مواخذے کی کارروائی شروع کرنے کی ڈیموکریٹس کی کوششیں بری طرح ناکام ہو گئی ہیں۔ ایک بڑے ناکام شخص تھامس میسی کو چھوڑ کر ہر ریپبلکن رکن نے پیٹ کے حق میں ووٹ دیا۔ ٹرمپ نے ہیگسیتھ کو امریکہ کا عظیم محب وطن قرار دیتے ہوئے وینزویلا اور ایران میں حاصل ہونے والی کامیابیوں، فوج میں ریکارڈ تقرری اور امریکی فوج کے حوصلے بلند کرنے کا سہرا انہیں دیا۔


اگر مواخذے کی یہ تجویز منظور ہو جاتی تو پیٹ ہیگسیتھ امریکی تاریخ میں مواخذے کی کارروائی کا سامنا کرنے والے پہلے وزیر دفاع بن جاتے۔ امریکی فوج کے کسی سویلین سربراہ کے خلاف آخری بار 1876 میں مواخذے کی کارروائی ہوئی تھی، جب ولیم بیلکنپ وزیر جنگ کے عہدے پر فائز تھے۔ حالانکہ یہ راحت عارضی ثابت ہو سکتی ہے، کیونکہ گزشتہ ہفتے ہونے والے وسط مدتی انتخابات میں کامیابی حاصل کرنے کے بعد جنوری 2027 سے ایوان نمائندگان اور سینیٹ دونوں کا کنٹرول ڈیموکریٹس کے پاس آجائے گا۔





’کریڈٹ لینے اور تصویریں کھنچوانے میں سب سے آگے رہے، تو چندہ چوری پر پی ایم اور سی ایم مسلسل خاموش کیوں ہیں؟‘ جے رام رمیش


قومی آواز بیورو

قومی آواز بیورو


رام مندر میں مبینہ چندہ چوری معاملہ پر کانگریس نے آج ایک بار پھر بی جے پی، آر ایس ایس اور وشو ہندو پریشد کو تنقید کا نشانہ بنایا ہے۔ کانگریس نے وزیر اعظم نریندر مودی کے ساتھ ساتھ اتر پردیش کے وزیر اعلیٰ یوگی آدتیہ ناتھ کی خاموشی پر بھی سوال اٹھایا ہے۔ کانگریس کے راجیہ سبھا رکن جے رام رمیش نے آج سوشل میڈیا پلیٹ فارم ’ایکس‘ پر ’چندہ چوری، عقیدت سے دھوکہ‘ عنوان کے ساتھ ایک تفصیلی پوسٹ جاری کی ہے۔ وہ لکھتے ہیں کہ ’’ایودھیا کے شری رام مندر میں ٹرسٹ سے لے کر تعمیرات، چندہ، چڑھاوے کی گنتی اور بینک میں جمع کرانے تک ہر جگہ بی جے پی، آر ایس ایس اور وی ایچ پی کے ہی لوگ بیٹھے تھے، تو اب وہ چڑھاوے کی چوری کی ذمہ داری سے پیچھے نہیں ہٹ سکتے۔‘‘



کانگریس لیڈر کا کہنا ہے کہ ’’سب سے حیرانی کی بات یہ ہے کہ 2021 میں ہی چڑھاوے میں گڑبڑی اور ہیرا پھیری کے الزامات خود آر ایس ایس سے وابستہ سابق اکاؤنٹس انچارج مہیپال سنگھ نے عائد کیے تھے، جنہیں خود آر ایس ایس نے ’سیوا‘ کے لیے مندر بھیجا تھا۔ ان کا الزام ہے کہ انہوں نے 2021 میں ہی چوری پکڑ کر چمپت رائے اور گوپال راؤ کو بتایا تھا، لیکن ذمہ دار لوگوں کے خلاف کارروائی کرنے کے بجائے انہیں ہی ہٹا دیا گیا۔ ایسے میں 5 سال تک چوری میں چمپت رائے اور گوپال راؤ کی شراکت داری کیسے نہیں ہے؟ کیا یہ اوپر سے نیچے تک ملی بھگت کر کے چوری اور لوٹ کا پختہ ثبوت نہیں ہے؟‘‘




جے رام رمیش نے میڈیا رپورٹس کا حوالہ دیتے ہوئے لکھا کہ ’’تعمیراتی کام دیکھنے والے انجینئر دینا ناتھ ورما نے بھی الزام عائد کیا تھا کہ ٹرسٹ کے دفتر کے کام میں 40 فیصد کمیشن مانگا گیا۔ ان کا دعویٰ ہے کہ انہوں نے اس کی آڈیو چمپت رائے کو سنائی اور اس کے بعد انہیں ہی پروجیکٹ سے ہٹا دیا گیا۔ کیا چمپت رائے سے اس معاملے میں براہ راست سوال جواب کیا گیا؟ جب انہیں پہلے سے ہی بے ضابطگیوں کی اطلاع تھی تو چارج شیٹ میں چمپت رائے، انیل مشرا اور گوپال راؤ ملزم کے بجائے گواہ کیسے بن گئے؟‘‘ ساتھ ہی انہوں نے لکھا کہ ’’میڈیا رپورٹس کے مطابق ملزم انوکلپ مشرا کا تعلق بجرنگ دل اور آر ایس ایس کی شاکھا سے رہا ہے۔ 30 اپریل 2026 کو ان کی بھاگوت کتھا میں خود چمپت رائے بھی پہنچے تھے۔ کیا یہ چوروں کو براہ راست اعلیٰ سطح پر سرپرستی فراہم کرنے کے مترادف نہیں ہے؟ میڈیا رپورٹس کے مطابق گنتی کے عملے کے انچارج سبھاش شریواستو اپنے گھر پر شاکھا لگاتے تھے۔ ایس آئی ٹی نے مبینہ طور پر انہیں ’دان پاتر‘ (عطیہ صندوق) کی چابیاں غیر مجاز لوگوں تک پہنچانے کا ذمہ دار قرار دیا ہے۔ الزام ہے کہ ملزم ٹنّو یادو، چمپت رائے کے ڈرائیور تھے۔‘‘


میڈیا رپورٹس کا حوالہ دیتے ہوئے جے رام رمیش ’ایکس‘ پر لکھتے ہیں کہ ’’پجاریوں کی بھرتی کے لیے اشتہار جاری کیے گئے، سلیکشن کمیٹی بنائی گئی اور تربیتی کمیٹی بھی تشکیل دی گئی۔ لیکن جس گنتی کے کمرے میں ہر ہفتے کروڑوں روپے آتے تھے، وہاں نہ کوئی اشتہار جاری کیا گیا اور نہ ہی انٹرویو لیا گیا۔ جن لوگوں نے بندر بانٹ کر کے اپنے اپنے قریبی لوگوں کو وہاں تعینات کیا، کیا انہیں ملزم نہیں بنایا جانا چاہیے تھا؟‘‘



جے رام رمیش کے مطابق 5 فروری 2020 کو وزیر اعظم مودی نے خود لوک سبھا میں ’شری رام جنم بھومی تیرتھ چھیتر ٹرسٹ‘ کے قیام کا اعلان کیا تھا۔ اس کے لیے پوری کارروائی انہوں نے خود خفیہ طریقے سے انجام دی تھی اور اس کے انتخاب کے معیار اور اس سلسلے میں ہونے والی بات چیت کے بارے میں کوئی معلومات عوامی سطح پر دستیاب نہیں ہیں۔ انہوں نے طنزیہ انداز میں سوال اٹھاتے ہوئے لکھا کہ ’’وزیر اعظم اور وزیر اعلیٰ دونوں ہی کریڈٹ لینے اور تصویریں کھنچوانے میں سب سے آگے رہے، لیکن چڑھاوے کی چوری پر وزیر اعظم اور وزیر اعلیٰ مسلسل خاموش کیوں ہیں؟ وزیر اعلیٰ نے اتر پردیش اسمبلی میں کہا تھا کہ ٹرسٹ کی اپیل پر حکومت نے ایس آئی ٹی تشکیل دی۔ کیا یہ سچ نہیں ہے کہ پہلی ایس آئی ٹی کی رپورٹ اسی ٹرسٹ کے حوالے کر دی گئی، جس کے عہدیداروں پر بدعنوانی کے الزامات تھے؟ جب وہ رپورٹ عوام کی نظر میں مشتبہ افراد کے ساتھ شیئر ہو چکی ہے تو اسے عوام سے کیوں چھپائی جا رہی ہے؟‘‘


کانگریس لیڈر کا کہنا ہے کہ ’’سب سے بڑا سوال یہ ہے کہ تمام مشتبہ افراد اور ملزمان کے روابط صرف بی جے پی، آر ایس ایس اور وشو ہندو پریشد سے ہی کیوں جڑے ہوئے ہیں؟ اب جوابدہی صرف گرفتار کیے گئے 8 ملازمین تک محدود نہیں رہ سکتی۔ مندر کی تعمیر، انتظام اور چڑھاوے کے پورے نظام سے وابستہ ہر ذمہ دار شخص کے کردار کی جانچ سپریم کورٹ کی نگرانی میں ہونی چاہیے۔ ‘‘ ان کے مطابق کانگریس کا مطالبہ ہے کہ تمام مالیاتی ریکارڈ عوام کے سامنے لائے جائیں، جانچ کا دائرہ وسیع کیا جائے اور قصوروار پائے جانے والے ہر شخص کے خلاف قانون کے مطابق کارروائی کی جائے۔ بھگوان شری رام کے نام پر ملنے والے چندے اور چڑھاوے کا پورا حساب ملک کو دینا ہوگا۔ کوئی عہدہ، سیاسی رسائی یا تنظیمی سرپرستی کسی کو جوابدہی سے بچا نہیں سکتی۔‘‘





ایران نے ارجنٹینا کی بحریہ اور فضائیہ کو ’دہشت گرد تنظیم‘ قرار دیا، آئی آر جی سی پر پابندی کا جواب


قومی آواز بیورو

قومی آواز بیورو


تہران/بیونس آئرس: ایران نے ارجنٹینا کی بحریہ اور فضائیہ کو دہشت گرد تنظیمیں قرار دے دیا ہے۔ ایران کا یہ اقدام ارجنٹینا کی جانب سے ایرانی اسلامی انقلابی گارڈ کور (آئی آر جی سی) کو دہشت گرد تنظیم قرار دیے جانے کے جواب میں سامنے آیا ہے۔ ایران نے یہ فیصلہ باہمی کارروائی کے اصول کے تحت کیا ہے۔


ایران کی وزارت خارجہ نے 10 نومبر کو ایک بیان جاری کرکے اس فیصلے کا اعلان کیا۔ بیان کے مطابق، یہ کارروائی 2019 میں منظور کیے گئے قانون کے تحت کی گئی ہے، جس میں دوسرے ممالک کی جانب سے ایران کے خلاف ایسے اقدامات کیے جانے کی صورت میں جوابی کارروائی کی گنجائش رکھی گئی ہے۔


ایرانی وزارت خارجہ نے اپنے بیان میں کہا کہ یہ فیصلہ باہمی اصول اور برابری کی بنیاد پر کیا گیا ہے۔ وزارت نے خبردار کیا کہ اس فیصلے کے نتیجے میں پیدا ہونے والے تمام نتائج کی ذمہ داری ارجنٹینا کی حکومت پر عائد ہوگی۔


واضح رہے کہ ارجنٹینا نے رواں سال جون میں ایران کی اسلامی انقلابی گارڈ کور (آئی آر جی سی) کو دہشت گرد تنظیم قرار دیا تھا۔ اس فیصلے کے بعد دونوں ممالک کے درمیان پہلے سے موجود کشیدگی میں مزید اضافہ ہوا ہے۔ ایران کا حالیہ اقدام اسی فیصلے کے جواب کے طور پر دیکھا جا رہا ہے۔




ارجنٹینا اور ایران کے تعلقات طویل عرصے سے کشیدہ ہیں۔ اس کی ایک بڑی وجہ 1994 میں ارجنٹینا کے دارالحکومت بیونس آئرس میں واقع اے ایم آئی اے یہودی کمیونٹی سینٹر پر ہونے والا بم دھماکہ ہے۔ اس حملے میں 85 افراد ہلاک اور سیکڑوں زخمی ہوگئے تھے۔


ارجنٹینا طویل عرصے سے اس حملے کے لیے ایران اور لبنان کی تنظیم حزب اللہ کو ذمہ دار ٹھہراتا رہا ہے۔ اس معاملے میں ارجنٹینا کا مؤقف رہا ہے کہ حملے کے پیچھے ایرانی عناصر اور حزب اللہ کا ہاتھ تھا۔ تاہم ایران نے ان الزامات کو ہمیشہ مسترد کیا ہے اور دھماکے میں کسی بھی طرح کی ملوث ہونے سے انکار کیا ہے۔


ایران کی جانب سے ارجنٹینا کی بحریہ اور فضائیہ کو دہشت گرد تنظیم قرار دینے کا فیصلہ دونوں ملکوں کے درمیان سفارتی تناؤ کو ایک نئے مرحلے میں لے جا سکتا ہے۔ اس سے نہ صرف دوطرفہ تعلقات متاثر ہونے کا خدشہ ہے بلکہ بین الاقوامی سطح پر بھی اس معاملے پر نئی بحث چھڑ سکتی ہے۔





’اجیت پوار کی این سی پی کے 20 سے 22 اراکین اسمبلی پارٹی چھوڑنے کی تیاری کر رہے ہیں!‘ سنجے راؤت کا دعویٰ



قومی آواز بیورو

قومی آواز بیورو


مہاراشٹر میں گزشتہ کافی وقت سے نیشنلسٹ کانگریس پارٹی (این سی پی) کے دونوں گروپ کے انضمام کی خبریں سامنے آ رہی ہیں۔ اس دوران شیو سینا (یو بی ٹی) کے رہنما اور راجیہ سبھا رکن سنجے راوت نے بڑا دعویٰ کیا ہے۔ ان کا کہنا ہے کہ اجیت پوار کی این سی پی کے 20 سے 22 اراکین اسمبلی پارٹی چھوڑ کر شرد پوار کی قیادت والی این سی پی میں شامل ہو سکتے ہیں۔ ان کے اس دعوے سے مہاراشٹر کی سیاست میں ہلچل مچ گئی ہے۔




ایک پریس کانفرنس سے خطاب کرتے ہوئے سنجے راؤت نے دونوں این سی پی گروپ کے انضمام کے بارے میں بات کرتے ہوئے کہا کہ ’’اجیت پوار جیسا کوئی رہنما نہیں ہے۔ مجھے انضمام کے بارے میں کچھ نہیں معلوم لیکن این سی پی کی اجیت پوار کے 20 سے 22 اراکین اسمبلی پارٹی چھوڑنے کی تیاری کر رہے ہیں اور یہ اراکین اسمبلی این سی پی کے بانی شرد پوار سے ملاقات کر رہے ہیں۔‘‘ سنجے راؤت نے کہا کہ اجیت پوار کی قیادت باقی نہیں رہی ہے۔ ایک طرح سے انہیں غلامی کرنی پڑ رہی ہے اور اپنا وقار داؤ پر لگانا پڑ رہا ہے۔ ایسے وقت میں یا تو وہ اپنے گھر (پارٹی میں) واپس لوٹ آئیں گے، جسے انضمام نہیں کہتے یا پھر وہ انتخابات سے قبل دیگر پارٹیوں میں شامل ہو جائیں گے۔ ساتھ ہی انہوں نے کہا کہ امت شاہ کی یہ پارٹی ایک بار پھر ٹوٹے گی۔ ان کے مطابق سنیترا پوار کی پارٹی امت شاہ کی ہے۔



سنجے راؤت کے مذکورہ دعوے کی تائید کرنے والے کئی واقعات بھی سامنے آ رہے ہیں۔ شرد پوار کی ممبئی رہائش گاہ (سلور اوک) پر ان دنوں ملاقاتوں کا سلسلہ جاری ہے۔ حال ہی میں جینت پاٹل اور امول کولہے نے شرد پوار سے ایک گھنٹے تک ملاقات کی اور مختلف امور پر تبادلۂ خیال کیا۔ دوسری جانب پنکج بھجبل اور ان کے اہل خانہ نے بھی شرد پوار سے ملاقات کی تھی۔ قابل ذکر ہے کہ شرد پوار فی الحال ممبئی میں اپنی رہائش گاہ پر آرام کر رہے ہیں۔ کچھ دن قبل انہیں اسپتال سے ڈسچارج کیا گیا تھا۔ ان کو سینے میں انفیکشن کی وجہ سے اسپتال میں داخل کرایا گیا تھا۔ حال ہی میں پرفل پٹیل اور پارتھ پوار نے شرد پوار سے ملاقات کی تھی اور ان کی خیریت دریافت کی تھی۔





کرناٹک حکومت ہر مستحق کسان کو دے گی 5 ہزار روپے خشک سالی راحت، دو قسطوں میں ملے گی رقم: ڈی کے شیوکمار


قومی آواز بیورو

قومی آواز بیورو


بنگلورو: کرناٹک کے نائب وزیر اعلیٰ ڈی کے شیوکمار نے کسانوں کو یقین دہانی کرائی ہے کہ ریاستی حکومت خشک سالی سے متاثرہ ہر مستحق کسان کو 5 ہزار روپے کی مالی امداد فراہم کرے گی۔ انہوں نے واضح کیا کہ مرکزی حکومت اپنا حصہ دے یا نہ دے، ریاستی حکومت اپنے وعدے کے مطابق کسانوں کو یہ رقم دو قسطوں میں ادا کرے گی۔ ساتھ ہی انہوں نے کہا کہ امدادی رقم کی ادائیگی میں اگر کوئی خامی یا گڑبڑی سامنے آتی ہے تو اسے درست کیا جائے گا۔


شیوکمار نے بدھ کو بنگلورو میں صحافیوں سے بات کرتے ہوئے کہا کہ پہلی قسط کے طور پر 2500 روپے پہلے ہی جاری کیے جا چکے ہیں۔ حکومت نے ایک ایسا طریقہ کار تیار کیا ہے جس کے ذریعے اس بات کو یقینی بنایا جائے گا کہ تمام مستحق کسانوں تک امدادی رقم پہنچے۔


انہوں نے کہا کہ کسانوں کو پریشان ہونے کی ضرورت نہیں ہے۔ اگر مرکزی حکومت مالی تعاون فراہم نہیں کرتی ہے تب بھی ریاستی حکومت نے ہر مستحق کسان کو مجموعی طور پر 5 ہزار روپے دینے کا فیصلہ کیا ہے۔ یہ رقم دو قسطوں میں ادا کی جائے گی۔




نائب وزیر اعلیٰ نے بتایا کہ بعض کسانوں کو بینک کھاتوں کی غلط تفصیلات اور قرض کی رقم کے ساتھ امدادی رقم کی ایڈجسٹمنٹ کے باعث ادائیگی نہیں ہو سکی ہے۔ حکومت ایسے معاملات کی جانچ کر رہی ہے اور متعلقہ دستاویزات کی تصدیق کے بعد خامیوں کو دور کیا جائے گا۔


انہوں نے کہا کہ جن کسانوں کے بینک کھاتوں کے نمبر اور دیگر تفصیلات درست ہیں، ان کے کھاتوں میں رقم منتقل ہو چکی ہے، جب کہ جن مستحقین کو ابھی تک امداد نہیں ملی ہے، ان کے مسائل حل کیے جائیں گے۔ انہوں نے واضح کیا کہ امدادی رقم کی تقسیم کا عمل ایک معمول کے نظام کے تحت براہ راست بینک کھاتوں میں رقم منتقل کرکے انجام دیا جا رہا ہے۔


شیوکمار نے امدادی رقم کے حساب کی وضاحت کرتے ہوئے کہا کہ فی ایکڑ 2500 روپے مقرر کیے گئے ہیں، جب کہ ہر مستحق کسان کو زیادہ سے زیادہ 5 ہزار روپے کی امداد دینے کا وعدہ کیا گیا ہے۔ انہوں نے کہا کہ اگر کسی کسان کو ملنے والی رقم میں فرق ہے تو وہ ایسے معاملات کا الگ سے جائزہ لیں گے۔


دوسری جانب ریاست کے نائب وزیر اعلیٰ جی پرمیشور نے بھی یقین دلایا کہ خشک سالی راحت کی ادائیگی میں سامنے آنے والی خامیوں کو فوری طور پر درست کیا جائے گا اور ہر مستحق کسان خاندان کو اعلان کردہ معاوضہ ملنا یقینی بنایا جائے گا۔


پرمیشور نے صحافیوں کو بتایا کہ بعض کسانوں کو 1500 روپے، جب کہ کچھ کو 2000 روپے ملے ہیں۔ بظاہر حکام نے ڈی بی ٹی (ڈائریکٹ بینیفٹ ٹرانسفر) کے ذریعے رقم منتقل کرتے وقت فی ایکڑ کے حساب سے ادائیگی کی ہے۔ انہوں نے کہا کہ متعلقہ حکام کو اس غلطی کو درست کرنے کی ہدایت دے دی گئی ہے۔